Tagubilin at Habilin


Isinulat ni Jose “Pete” Lacaba

Binigkas ni Armida Siguion-Reyna

Musika ni Ryan Cayabyab

Mabuhay ka, kaibigan!
Mabuhay ka!
Iyan ang una’t huli kong
Tagubilin at habilin:
Mabuhay ka!

Sa edad kong ito, marami akong maibibigay na payo.
Mayaman ako sa payo.

Maghugas ka ng kamay bago kumain.
Maghugas ka ng kamay pagkatapos kumain.
Pero huwag kang maghuhugas ng kamay para lang makaiwas sa sisi.
Huwag kang maghuhugas ng kamay kung may inaapi
Na kaya mong tulungan.

Paupuin sa bus ang matatanda at ang mga may kalong na sanggol.
Magpasalamat sa nagmamagandang-loob.
Matuto sa karanasan ng matatanda
Pero huwag magpatali sa kaisipang makaluma.

Huwag piliting matulog kung ayaw kang dalawin ng antok.
Huwag pag-aksayahan ng panahon ang walang utang na loob.
Huwag makipagtalo sa bobo at baka ka mapagkamalang bobo.
Huwag bubulong-bulong sa mga panahong kailangang sumigaw.

Huwag kang manalig sa bulung-bulungan.
Huwag kang papatay-patay sa ilalim ng pabitin.
Huwag kang tutulog-tulog sa pansitan.

Umawit ka kung nag-iisa sa banyo.
Umawit ka sa piling ng barkada.
Umawit ka kung nalulungkot.
Umawit ka kung masaya.

Ingat lang.

Huwag kang aawit ng “My Way” sa videoke bar at baka ka mabaril.
Huwag kang magsindi ng sigarilyo sa gasolinahan.
Dahan-dahan sa matatarik na landas.
Dahan-dahan sa malulubak na daan.

Higit sa lahat, inuulit ko:

Mabuhay ka, kaibigan!
Mabuhay ka!
Iyan ang una’t huli kong
Tagubilin at habilin:
Mabuhay ka!

Maraming bagay sa mundo na nakakadismaya.
Mabuhay ka.
Maraming problema ang mundo na wala na yatang lunas.
Mabuhay ka.

Sa hirap ng panahon, sa harap ng kabiguan,
Kung minsan ay gusto mo nang mamatay.
Gusto mong maglaslas ng pulso kung sawi sa pag-ibig.
Gusto mong uminom ng lason kung wala nang makain.
Gusto mong magbigti kung napakabigat ng mga pasanin.
Gusto mong pasabugin ang bungo mo kung maraming gumugulo sa utak.

Huwag kang patatalo. Huwag kang susuko.

Narinig mo ang sinasabi ng awitin:
”Gising at magbangon sa pagkagupiling,
Sa pagkakatulog na lubhang mahimbing.”
Gumising ka kung hinaharana ka ng pag-ibig.
Bumangon ka kung nananawagan ang kapuspalad.

Ang sabi ng iba: “Ang matapang ay walang-takot lumaban.”
Ang sabi ko naman: Ang tunay na matapang ay lumalaban
Kahit natatakot.

Lumaban ka kung inginungodngod ang nguso mo sa putik.
Bumalikwas ka kung tinatapak-tapakan ka.
Buong-tapang mong ipaglaban ang iyong mga prinsipyo
Kahit hindi ka sigurado na agad-agad kang mananalo.

Mabuhay ka, kaibigan!
Mabuhay ka!
Iyan ang una’t huli kong
Tagubilin at habilin:
Mabuhay ka!

Ang ganda-ganda di ba? sa sobrang ganda napabili tuloy ako ng CD na Pop Lola. Imagine si Ms. Armida na kilala sa mga “Aawitan Kita”-music, kumakanta ng mga pop songs. Dito nagsimula ang love affair ko sa iba pang kanta na hindi karaniwang naeenjoy ng mga kaedad ko.

Advertisements

3 mga puna

Filed under Uncategorized

3 responses to “Tagubilin at Habilin

  1. hazurh

    bossing… ang tagal ko ng hinahanap ang album ni armida.. napakinspiring kasi kaso wala na akong mahanap sa record store dito kasi ako sa davao eh… baka pede mong mashare ang album niya.. sana magkatime ka. salamt ng marami… God bless ito ng pala email add ko nagbabakasakali na matugonan mo ang request ko.. hazurh@yahoo.com .. salamat

  2. adaengkantada

    napakaganda nga nito. sa katunayan, bumili ako ng album na Pop Lola ni Ms. Armida para marinig ito. hinanap ko pa iyon sa buong mall dahil sa una kong pinuntahan na mall, pinull-out na ng music shop (tama ba?) ang album na ito.

    wala akong ibang nakitang video nito sa youtube, kundi ito lang mula sa file’s ni pendukyut.

    kung may mahanap ka minsan, pashare ha.

  3. pilipinaako

    narinig ko po ito sa radyo. naiyak po ako at natouch. sana po ay mayroong magupload ng buong pagbibigkas kasama ng instrumento nito sa youtube!

Mag-iwan ng Tugon

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Baguhin )

Google+ photo

You are commenting using your Google+ account. Log Out /  Baguhin )

Twitter picture

You are commenting using your Twitter account. Log Out /  Baguhin )

Facebook photo

You are commenting using your Facebook account. Log Out /  Baguhin )

Connecting to %s